रुपन्देहीको कञ्चन ३ हरैयामा अवस्थित हरैया बहुमुखी क्याम्पसमा हाजिरीजवाफ प्रतियोगिता सम्पन्न भएको छ । अतिरिक्त क्रियाकलाप समितिको आयोजनामा भएको कार्यक्रम समितिका संयोजक केबि धुवाँलेको अध्यक्षता, क्याम्पस प्रमुख प्रकाश खनालको प्रमुख आतिथ्यता, प्राध्यापक तारादेवी अधिकारीको सञ्चालनमा सम्पन्न भएको हो ।

कार्यक्रममा क्वीज मास्टरको भूमिका शिक्षाशास्त्र सङ्काय प्रमुख विनोद पौडेलले निर्वाह गर्नुभएको थियोे । ९ वटा टिमबीच भएको प्रतिस्पर्धामा बिबिएस दोस्रो वर्षका बालकृष्ण भट्टराई, रामशरण पासी र सीता पौडेलको समूह प्रथम, बिबिएस तेस्रो वर्षका गजेन्द्र विश्वकर्मा, अजयकुमार जयसवाल र सङ्गीता हरिजनको समूह द्वितीय, बिबिएस तेस्रो वर्षका मिलन आचार्य, अनिता थापा र कृति चालिसेका साथै बिएड दोस्रो वर्षका तुल्सी थापा मगर, सन्ध्या थापा र राजेशकुमार गुप्ताको समूह समान तृतीय भएका छन् ।

विजयी विद्यार्थी समूहलाई प्रमाणपत्र र पुरस्कारद्वारा पुरस्कृत गर्नुहुँदै क्याम्पस प्रमुख प्रकाश खनालले अतिरिक्त क्रियाकलापमा सहभागी भएका सम्पूर्णमा धन्यवाद व्यक्त गर्नुका साथै विद्यार्थीको सर्वाङ्गीण विकासका लागि क्याम्पस सदा अग्रसर भएको बताउनुभयो ।