जिल्ला सहकारी संघ र राष्ट्रिय सहकारी बैंकको संयुक्त आयोजनामा एक दिने अभीमुखीकरण तालिम बुटवलमा सोमबार सम्पन्न भएको छ ।

सहकारीमा नियामकीय निर्देशन, संशोधित सहकारी ऐन र मापदण्ड कार्यान्वयन बिषयक तालिममा रुपन्देही जिल्लाका सहकारीका अध्यक्ष, व्यवस्थापक लगायत पदाधिकारीहरु गरि एकसय जनाको सहभागिता रहेको थियो ।
सहकारी प्राधिकरण ऐन दुवै सदनले पारित गरि गठन प्रकृयामा रहेको अवस्थामा सोमबार अभीमुखीकरण कार्यक्रम गरिएको हो ।

कार्यक्रममा बोल्दै जिल्ला सहकारी संघ रुपन्देहीका अध्यक्ष भीम तुलाचनले अभिमुखीकरण कार्यक्रमले सहकारी प्राधिकरण ऐनका विषयमा रहेको प्रावधान लगायतका बिषयमा छलफल गरि साझा धारणा बनाउन सहज हुने बताउनुभयो । कार्यक्रममा उपस्थित सहकारीकर्मीहरुले सहकारीको नियामकीय निर्देशन, सहकारी ऐन र मापदण्ड कार्यान्वयनका विषयमा जिज्ञासा राख्नुभएको थियो ।

पछिल्लो समय सहकारी ठगीका घटना बढिरहेकोले सरकारले नयाँ सहकारी ऐनमार्फत सहकारीका प्रावधान कसिलो बनाउने, नियामक निकायलाई प्रभावकारी बनाउने र सहकारी व्यवस्थापनका मापदण्डमा कडाई गर्ने गरि नयाँ ऐनको गृहकार्य गरिरहेको छ । अहिले देशैभरीबाट सहकारी सम्वन्धि सुझाव लिने काम भैरहेको छ ।