लुम्बिनी प्रदेशमा नवनियुक्त युवा तथा खेलकुद मन्त्री सन्तोषकुमार पाण्डेले पद तथा गोपनियताको सपथ ग्रहण गर्नु भएको छ ।
प्रदेश प्रमुख कृष्णबहादुर घर्ती समक्ष नवनियुक्त मन्त्री पाण्डेले सोमबार पद तथा गोपनीयताको सपथ ग्रहण गर्नुभएको हो ।

लुम्बिनी प्रदेशका मुख्यमन्त्री चेतनारायण आचार्य, पूर्व मुख्यमन्त्री डिल्लीबहादुर चौधरी, प्रदेशका मन्त्री तथा कर्मचारीहरुको उपस्थितीमा मन्त्री पाण्डेले प्रदेश प्रमुखको कार्यालय बुटवलमा सोमवार सपथ ग्रहण गर्नुभएको हो ।

मन्त्रिपदको सपथ पछि पत्रकारहरुसंग कुराकानी गर्दै युवा तथा खेलकुद मन्त्री सन्तोषकुमार पाण्डेले आफू चौथोपटक मन्त्री पदको सपथ लिएको स्मरण गर्दै जनताको साथ र भाग्य दुवैले आफूलाई साथ दिएको बताउनुभयो । उहाँले मुलुकको विकास खेलकुद क्षेत्र र पर्यटन क्षेत्रबाट मात्रै संभव रहेको मन्त्री पाण्डेको भनाई छ ।

लुम्बिनीका मुख्यमन्त्री चेतनारायण आचार्यले आइतबार मन्त्रिपरिषद् बिस्तार गर्नु भएको थियो । मुख्यमन्त्री आचार्यले खाली रहेको युवा तथा खेलकुद मन्त्रीमा लोसपाका संसदीय दलका नेता पाण्डेलाई नियुक्त गर्नु भएको हो ।