रुपन्देहीको सैनामैना नगरपालिका १० झिमझिमियामा परिक्षणका लागि एक कट्ठा जग्गामा बुधबार कोदो रोपिएको छ ।
तराईमा सुक्खा हुने तथा पानी नजम्ने स्थानमा कोदो बाली उत्पादन गर्न सकिन्छ कि सकिदैन भन्ने परिक्षण गर्न बुधबार परिक्षणका रुपमा कोदो रोपिएको हो ।

तराईमा पछिल्लोसमय पानी कम पर्न थालेको र पानी नजम्ने खेतमा परिक्षणकै क्रममा विभिन्न आठ प्रजातिको कोदो रोपिएको हो ।
राष्ट्रिय जीन बैंक र सयुक्त राष्ट्रसंघीय खाद्य तथा कृषि संगठनको संयुक्त आयोजनामा कोदो विस्तार कार्यक्रम अन्तरगत तराईका विभिन्न जिल्लामा परिक्षणका रुपमा कोदो रोपिएको हो ।

राष्ट्रिय जीन बैंक खुमलटार ललितपुरका कृषि अनुसन्धान विज्ञ डा. मुकुन्द भट्टराईले तराईमा पानीको कमीले गर्दा सुक्खा खडेरी परेको अवस्थामा धानको विकल्पमा परिक्षणका रुपमा कोदो खेतीलाई जोड दिएको बताउनुभयो ।

उहाँले सुक्खा सहन सक्ने र डुबान पनि सहन सक्ने कोदोको विभिन्न आठ प्रकारका जात परिक्षणका रुपमा खेतीका लागि सुरुवात गरिएको बताउँदै बाँकेमा यो सफल भएकोले कपिलबस्तु र रुपन्देहीको सैनामैनामा परिक्षण गर्न कोदो रोपिएको बताउनुभयो ।

कोदो स्वास्थ्यका लागि लाभदायक भएकोले धानको विकल्पमा कोदो रोप्न सकिने अवस्थामा अर्को बर्ष कोदो बाली लगाउन प्रोत्साहन गरिने उहाँले बताउनुभयो ।
यसैगरी सैनामैना नगरपालिका वडा नंं १० का वडा अध्यक्ष कृष्णप्रसाद घिमिरेले परिक्षणका लागि रोपिएको कोदोले राम्रो उत्पादन दिएमा अर्को बर्षदेखि किसानलाई कोदो रोप्न प्रोत्साहन गरिने बताउनुभयो । यसअघि नेपालगंजको शान्तिनगर र कपिलवस्तुको मधुबनमा परिक्षणका रुपमा कोदो रोपिएको छ ।