अर्घाखाँचीमा बाघले एउटै फार्मका सात वटा बाख्रा मारेको छ । यस्तै आठवटा हराएका छन् ।
शितगङ्गा नगरपालिका वडा नम्बर १३ मुस्यान माझीफाँटमा रहेको हिमालयन बाख्रापालन तथा कृषि फार्मका ३० वटा बाख्रा चराउनका लागि जङ्गलमा छाडेकोमा एउटा घाइतेसहित १५ वटा फर्किएका थिए । बाँकी बाख्रा नफर्केपछि खोजी गर्न जाँदा सातवटा बाख्रा बाघले मारेको अवस्थामा भेटिएका हुन् ।

आठवटा अझै नभेटिएको फार्मका सञ्चालक घनश्याम अधिकारीले जानकारी दिनुभयो । बुधवार दिउँसो जङ्गलमा बाख्रा चराउने बेला घटना भएकोले अब बाँकी आठवटा बाख्रा पनि भेटिने आशा मरेको उहाँले बताउनुभयो । उहाँले बाख्रापालनका लागि दुई वर्षअघि १२ लाख रुपैयाँ खर्च गरेर फार्म स्थापना गर्नुभएको हो ।
बाख्रासँगै फार्ममा ब्रोइलर कुखुरा र बङ्गुर पनि पालिएको छ । गएको जेठ महिनामा २५ सय ब्रोइलर कुखुरामध्ये एकैदिन एक हजार दुई सय कुखुरा मरेका थिए । फेरि बाख्रामा ठूलो क्षति पुगेको उहाँले गुनासो गर्नुभयो ।