रुपन्देहीको लुम्बिनी साँस्कृतिक नगरपालिकाका नगर प्रमुख सजरुद्दिन मुसलमानको निधन भएको छ ।
लुम्बिनी साँस्कृतिक नगरपालिका वडा नम्बर ३ पडरिया निवासी मुसलमानको सनिवार बिहान ९ बजे निधन भएको हो ।
पछिल्लो केहि समयदेखि मुटुको विरामी रहेका मुसलमानको हृदयघातका कारण मृत्यु भएको लुम्बिनी सांस्कृतिक नगरपालिकाका प्रमुख प्रशासकीय अधिकृत तारा ज्ञवालीले जानकारी दिनुभयो ।

मलेसियाको एक हप्ताको पारिवारिक भ्रमण गरी शुक्रबार मात्र लुम्बिनी आएका मुसलमानलाई शनिवार बिहान स्वास्थमा असहज देखिएपछि लुम्बिनीको महजिदियास्थित अस्पताल लगिएको थियो ।
त्यहाँ उपचार हुन नसकेपछि भैरहवा लैजाने तयारी गर्दै गर्दा उहाँको निधन भएको ज्ञवालीले जानकारी दिनुभयो ।
७३ वर्षीय मुसलमानका तीन छोरा र पाँच छोरी छन् । उहाँको धार्मिक परम्परा अनुसार शनिबार साँझ अन्तिम संस्कार गरिएको छ ।

त्यसअघि शव यात्रामा शनिवार साँझ हजारौं शुभेच्छुक, शुभचिन्तक, नेपाली कांग्रेसका नेता कार्यकर्ता लगायत विभिन्न राजनैतिक दलका नेता कार्यकर्ता र स्थानीय जनताको ठूलो सहभागिता थियो ।
सरल स्वभावका मुसलमान २०७९ सालको निर्वाचनमा नेपाली कांग्रेसबाट लुम्बिनी सांस्कृतिक नगरपालिकाको प्रमुखमा निर्वाचित हुनुभएको थियो ।