रुपन्देहीको सैनामैना नगरपालिका ४ मा रहेको चौतारी बचत तथा ऋण सहकारी संस्थाको १४ औं बार्षिक साधारण सभा शनिबार सम्पन्न भएको छ । साधारण सभाको उदघाटन गर्दै सैनामैना नगरपालिकाका प्रमुख तथा सहकारीका सल्लाहकार फणेन्द्रप्रसाद शर्माले सहकारीले यस क्षेत्रको आर्थिक बिकासमा ठूलो भूमिका निर्वाह गरेको बताउँदै आगामी दिनमा पनि सहकारीले प्रगती र उन्नती गर्ने विश्वास ब्यक्त गर्नुभयो । उहाँले २०४६ पछि मुलुकमा सहकारी अभियान नै चलेको बताउँदै अभियानकै कारण सहकारीहरु विस्तार भएको र त्यसबाट बचतकर्ताको जीवनमा परिवर्तन आएको बताउनुभयो ।

नगर प्रमुख शर्माले विगत ३५ बर्षको बीचमा मुलुकमा हजारौं सहकारी स्थापना भएको र सहकारीमा आवद्ध नागरिकको जीवनमा यी सहकारीले टेवा पु¥याएको उल्लेख गर्दै सहकारीकै कारण जनता विकाससंग जोडिन सफल भएको र त्यसबाट जनताको जीवनस्तर माथि उठाउन सहयोग पुगेको उल्लेख गर्नुभयो ।

बार्षिक साधारण सभाको अवसरमा नेपाली कांग्रेस लुम्बिनी प्रदेशका सदस्य चित्रबहादुर केसी, नेपाली कांग्रेस सैनामैनाका सभापति रणबहादुर खनाल, सैनामैना नगरपालिका वडा नं. ४ का वडा अध्यक्ष रामप्रसाद अधिकारी र सहकारीका पूर्व अध्यक्ष लोकनाथ अधिकारीले सहकारी स्थापनाको छोटो समयमा चौतारी सहकारी यस क्षेत्रकै उत्कृष्ट सहकारीको रुपमा स्थापित भएको भन्दै आगामी दिनमा पनि सहकारीको उत्कृष्ट कार्यका लागि शुभकामना दिनुभएको थियो ।

साधारण सभाको अवसरमा महिला र पुरुष गरि दुईजना ज्येष्ठ सदस्य, एसइईमा उत्कृष्ट नतिजा ल्याउने शेयर सदस्यका दुई विद्यार्थी, चिकित्सा शिक्षा अध्ययनमा नाम निकाल्ने तीन जना शेयर सदस्यका छोराछोरीलाई सम्मानित गरिएको थियो । त्यसैगरी असल ऋणी र असल बचतकर्तालाई समेत साधारण सभाको अवसरमा सम्मान गरिएको थियो ।

चौतारी बचत तथा ऋण सहकारी संस्थाकी अध्यक्ष सावित्रा शर्माको अध्यक्षतामा भएको साधारण सभाको संचालन सहकारीका सचिव चिन्तामणि भुसालले गर्नुभएको थियो भने स्वागत उपाध्यक्ष संगीता अधिकारीले गर्नुभएको थियो ।