लुम्बिनी, २०। साउन
लुम्बिनी सांस्कृतिक नगरपालिकाले नगरका सामुदायिक विद्यालयका प्रधानाध्यापकहरुसंग कार्यसम्पादन सम्झौता गरेको छ ।
नगरको शिक्षा क्षेत्रलाई गुणस्तरीय र नतिजामुखी बनाउने उद्देश्यले कार्यसम्पादन सम्झौता गरिएको नगरपालिका शिक्षा शाखाले जनाएको छ ।
मंगलबार नगरपालिकामा आयोजित कार्यसम्पादन सम्झौताको अवसरमा बोल्दै लुम्बिनी सांस्कृतिक नगरपालिकाका प्रमुख सजरुद्दीन मुसलमानले नगरपालिकाले शिक्षा क्षेत्रको सुधारका लागि विद्यार्थीहरुलाई ल्यापटपदेखि साईकल र अन्य विभिन्न सामाग्री दिएर प्रोत्साहन गर्ने काम सुरु गरेको बताउनुभयो । उहाँले नगर क्षेत्रका विद्यालयहरुले शैक्षिक क्षेत्रको स्तरोन्नतीमा मेहनत गरिरहेको बताउदै नगरपालिकाले कदर गर्ने प्रतिवद्धता जनाउनुभयो ।

लुम्बिनी सांस्कृतिक नगरपालिकाका शिक्षा शाखा प्रमुख उपसचिव हरिप्रसाद ज्ञवालीले समग्र विद्यालयहरुको समग्र व्यवस्थापन र शैक्षिक गुणस्तर सुधार गर्नकालागि नगरपालिका र नगरका सामुदायिक विद्यालयका प्रधानाध्यापकहरुबीच कार्यसम्पादन करार सम्झौता गरिएको बताउँदै विद्यालय तहमा शैक्षिक योजना निर्माण, शैक्षिक गुणस्तर बृद्धि, विद्यालयको सुशासन तथा विद्यार्थीहरुको सिकाई क्षमता बृद्धिमा सहयोग पु¥याउने उद्देश्यले कार्यसम्पादन करार गरिएको बताउनुभयो ।

लुम्बिनी ज्ञान प्रभा प्राथमिक विद्यालयका प्रधानाध्यापक मोतीलाल यादवले कार्य सम्पादन सम्झौताले आफूहरुमा जोश जाँगर बढाउन सहयोग पु¥याएको महसुस भएको बताउनुभयो । उहाँले नगरमा पहिलोपटक नगर प्रमुख, प्रमुख प्रशासकीय अधिकृत सहितका पदाधिकारीहरु र प्रधानाध्यापकहरुबीच भएको बैठकले नगरको शैक्षिक गुणस्तर सुधार हुने विश्वास ब्यक्त गर्नुभयो ।

त्यसैगरी मायादेवी आधारभूत विद्यालयका प्रधानाध्यापक जमुनाप्रसाद विश्वकर्माले नगरपालिका र विद्यालयका प्रधानाध्यापकहरुबीच भएको कार्यसम्पादन करार सम्झौता सकारात्मक रहेको बताउनुभयो । उहाँले नगरपालिकाको प्रयासमा सामुदायिक विद्यालयहरुको सहयोग रहने बताउँदै यसबाट विद्यालयहरुको गुणस्तर सुधारमा सहयोग पुग्ने विश्वास ब्यक्त गर्नुभयो ।

कार्यक्रममा लुम्बिनी सांस्कृतिक नगरपालिकाकी प्रमुख प्रशासकीय अधिकृत तारा ज्ञवालीले नगरपालिकाले शिक्षाको सुधारका लागि प्रधानाध्यापकहरुसंग कार्यसम्पादन करार सम्झौता गरेको बताउँदै अव यसबाट नगरको शिक्षाको सुधारमा सहयोग पुग्ने विश्वास ब्यक्त गर्नुभयो । लुम्बिनी सांस्कृतिक नगरपालिकाले पहिलोपटक नगरका सामुदायिक विद्यालयका प्रधानाध्यापकहरुसंग कार्यसम्पादन करार सम्झौता गरेको जनाएको छ ।
कार्यक्रमको सहजीकरण नगरपालिका शिक्षा अधिकृत लक्ष्मी पराजुली र सहायक शिक्षा अधिकृत प्रमिला पछाइले गर्नुभएको थियो ।